Manchester United është dorëzuar në lidhje me Paul Pogba. Mesfushori francez ka edhe një vit kontratë, por nuk dëshiron të rinovojë.
“Djajtë e Kuq” e kanë kuptuar dëshirën e lojtarit për të provuar një aventurë të re dhe e kanë nxjerrë në merkato.
Klubi anglez kërkon 80 milion euro për të lënë të lirë 28-vjeçarin, për të cilin shpenzoi 35 milion më shumë për ta blerë nga Juventusi në verën e vitit 2016.
Pikërisht klubi italian, aty ku Pogba kaloi katër sezone fantastike, pritet të jetë destinacioni i tij i ardhshëm. Max Allegri e do sërish në skuadër.
Shuma e kërkuar nga United është e konsiderueshme, teksa edhe agjenti i kampionit të botës, Mino Raiola, ka kërkesa të larta sa i përket rrogës së lojtarit dhe komisioneve të operacionit.
Juventusi është i interesuar prej kohësh për të rikthyer mesfushorin në Torinon bardhezi, me United që pret 80 milion euro për të lejuar largimin e një prej yjeve të skuadrës.
