Italia luan një miqësore ndaj Çekisë sonte në mbrëmje (20:45), sfidë që do të luhet në “Renato Dall’Ara” në Bologna. Trajneri i kombëtares së kaltër, Roberto Mancini deklaron se objektivi i madh është mbërritja në finalen e Euro 2020.
Më pas një vlerësim dhe urim për Giacomo Raspadorin, sulmuesin e talentuar 21-vjeçar të Sassuolos, i cili e ka merituar një ftesë për kompeticionin e rëndësishëm të kombëtareve.
“Të drejtosh një kombëtare ndryshon me drejtimin e një klubi. Kur afrohet një turne kaq i rëndësishëm si Euro 2020, emocionet shtohen dhe të gjithë mezi presin të fillojnë betejat.
Shpresojmë të arrijmë më 11 korrik në finalen e Wembley. Raspadori? Ai e meriton të ndodhet këtu. Është një sulmues me karakteristika të ndryshme nga Immobile dhe Belotti. Uroj të futet dhe të bëjë atë që bëri Paolo Rossi.
Më pas një koment për Gigio Donnarumma dhe ata që mbetën pa një ftesë. “Donnarumma është i qetë, nuk shoh probleme tek ai. Më vjen keq për ata që mbetën jashtë Euro 2020, u hidhëruan, por nuk e kam pasur të lehtë të zgjedh“, deklaroi Mancini.
