Trajneri i Italisë, Roberto Mançini, ka folur në vigjilje të sfidës Belgjikë-Itali, që do të zhvillohet ditën e premte në orën 21:00. Kjo përballje do të jetë e vlefshme për fazën çerekfinale të EURO 2020.
Një përballje speciale, ku nuk pritet të mungojë spektakli. Në konferencën e zakonshme për shtyp, Mançini, ndër të tjera, ka deklaruar se shpreson që De Bryjn dhe Eden Hazard, të cilët dolën të lënduar nga sfida me Portugalinë, të jenë në fushë ndaj tyre.
“Duhet të bëjmë disa zgjedhje, por tashmë jemi të mirëorientuar. Gjithsesi të presim ditën e nesërme, le të shohim kushtet fizike të të gjithëve. Nesër do të jemi më mire. Shpresoj shumë që të dy yjet të jenë në fushë nesër, por jam i sigurt që Belgjika po përgatit një ndeshje të mirë, ashtu sikurse dhe ne.
Ndeshjet si ajo me Austrinë na bëjnë më të fortë. Ne kem vuajtur, por kemi gjuajtur në portë plot 26 herë. Ka pasur momente të vështira, por në fund fituam. Ne po përballemi me ekipin më të mirë në Evropë, ata janë në krye të renditjes së UEFA-s, e kjo jo pa qëllim. Tani nuk ka sfida të lehta, të gjitha sfidat luhen për t’u fituar dhe ne do të bëjmë më të mirën tonë”, u shpreh Mançini.
