Apeli i GJKKO vendosi sot që Fredi Beleri të vijojë të qëndrojë në burg, ndërkohë që mbrojtësit e tij ligjorë po bëjnë çdo tentativë që ai të ketë mundësinë të ushtrojë mandatin si kryebashkiak.
Beleri i është drejtuar Gjykatës së Shkallës së Parë të Juridiksionit të Përgjithshëm me kërkesë për të vërtetuar mandatin e tij si kryetar bashkie në Himarë, kërkesë e cila pritet të shqyrtohet.
Avokati i Belerit tha për Top Channel se do t’i drejtohet me urgjencë Gjykatës së Lartë në mënyrë që ata të shprehen brenda 45 ditëve.
“Klienti im kërkon të shkojë në Himarë pranë qytetarëve që do t’u shërbejë dhe nuk ekziston asnjë mundësi ikjeje”, deklaroi avokati Edmond Dema.
“Me vendimin nr. 611 datë 25.05.2023 Komisioni Qëndror Zgjedhor ka vendosur:
1. Dhënien e mandatit të Kryetarit të Bashkisë Himarë, Qarku Vlorë, z. Dhionisios (Alfred) Beleri, të propozuar nga subjekti zgjedhor Koalicioni “Bashkë Fitojmë”.
2. Ky vendim hyn në fuqi menjëherë dhe publikohet në faqen elektronike zyrtare të Komisionit Qendror të Zgjedhjeve.
Në nenin 60/1 të ligjit nr. 139/2015 të ndryshuar parashikohet se:
1. Mandati i kryetarit të bashkisë vërtetohet nga gjykata e rrethit gjyqësor, (dhoma civile) në juridiksionin e së cilës përfshihet bashkia përkatëse, brenda 20 ditëve nga data e shpalljes së rezultatit të zgjedhjes së tij.”
Kërkuesi, me anë të kësaj kërkese, i drejtohet Gjykatës Kompetente me qëllim vërtetimin e mandatit të tij, brenda afatit të parashikuar në ligj. Bashkëngjitur kërkesës: – Vendimi nr. 611 datë 25.05.2023 i Komisionit Qëndror Zgjedhor”, shkruhet në kërkesë, raporton TCH.
Për Belerin nuk ka ende një vendim dënimi të formës së prerë nga gjykata, ndërkohë që pikëpyetjet lidhen me faktin nëse ai do të mund të ushtrojë detyrën e Kryebashkiakut.
Nëse Beleri nuk betohet apo nuk paraqitet për tre muaj në bashki, mund ta humbasë mandatin dhe të shkarkohet.
Nga ana tjetër, Këshilli Bashkiak mund të bëjë kërkesë për shkarkimin e tij, por vendimi merret nga Këshilli i Ministrave.
Pas vendimit të Apelit të GJKKO pati një tjetër reagim nga Athina zyrtare përmes Ministrisë së Jashtme, e cila e konsideroi si “vendim politik mbajtjen në qeli të Fredi Belerit”. Madje në deklaratën e Ministrisë së Jashtme greke thuhet se nga 31 raste të denoncuara për krime elektorale, i vetmi që ndodhet në burg është Beleri.
Discussion about this post