Ministria e Infrastrukturës dhe Energjisë ka anuluar për herë të dytë garën e partneritetit publik-privat për ndërtimin e aeroportit të Sarandës. Njësoj si herën e parë, shkak për mos finalizimin me sukses të procedurës është bërë mosparaqitja e asnjë oferte brenda afateve kohore të dorëzimit të ofertave, çka do të thotë se nuk ka pasur investitorë të interesuar.
Ndërkohë gara për dhënien me koncesion të aeroportit të Sarandës u hap në fillim të gushtit, dhe në përpjekje për të siguruar oferta të vlefshme, MIE ndryshoi 2 herë kriteret dhe afatin e dorëzimit të ofertave, duke e zgjatur deri në datën 14 tetor, nga 23 shtatori që ishte fillimisht.
Por gara u rihap në 26 tetor, teksa kompanitë kishin një muaj kohë për dorëzimin e dokumenteve. Pavarësisht këtyre ndryshimeve, duket se asnjë investitor nuk ka paraqitur interes për të nënshkruar një kontratë 35-vjeçare, me një vlerë të parashikuar investimit prej 34.32 milionë euro.
Investimi do të duhej të kryhej nga kompania që do të shpallej fituese në garë, ndërkohë që pas projektimit, ndërtimit, operimit dhe mirëmbajtjes, në përfundim të periudhës 35-vjeçare do të bëhej transferimi i veprës aeroportuale pranë organeve shtetërore.
Kujtojmë se kërkesat specifike theksonin nevojën për ndërtimin e një terminali që fillimisht do të akomodonte 130 mijë pasagjerë në vit, ndërsa pas 10 vitesh 700 mijë pasagjerë. Aeroporti i Sarandës do të kishte kryesisht profilin e një aeroporti turistik, që funksionon zakonisht 7-8 muaj në vit, por sipas autoriteteve ai mund të shërbente edhe përtej sezonit për fluturime të brendshme.
Anulimi për herë të dytë i këtij tenderi, hedh dyshimet se Rama, siç ka vepruar me PPP-të e tjera, duket se nuk po kap ofertën e duhur që të shpall fituesin për këtë projekt.
Gijotina.com
Discussion about this post