Tenderi 11 milionë lekë për blerje ekranesh vizualimi nga RTSH rrëzohet nga Komisioni i Prokurimit Publik. Pak ditë më parë Gijotina.com ka publikuar ankesën e dërguar nga një operator ekonomik në lidhje me këtë tender. Ankimuesi pretendonte se Enkelejd Joti ka vendosur kritere diskriminuese në këtë tender, me qëllim që kontrata t’i jepet kompanisë e cila mund të jetë paracaktuar si fituese.Më 7 shtator 2022, operatori ekonomik “Start Co” SHPK ka paraqitur ankesë në formë shkresore pranë KPP dhe autoritetit kontraktor, duke kërkuar modifikimin e dokumenteve të procedurës së prokurimit objekt-ankimi. Pasi ka evidentuar një sërë kërkesash që cenonin konkurrencën e lirë.
Fillimisht, RTSH si Autoriteti Kontraktor nuk ka reaguar por pasi i ka bërë kërkesë edhe KPP, duke i vënë në dukje shkeljet e bëra, Joti u zgjua dhe ka reaguar. Në një përgjigje për KPP ai ka pranuar se kërkesat dhe shkeljet e evidentuara nga ankimuesi qëndrojnë, për këtë arsye do të rishikojë edhe njëherë kontratën si dhe ofertat e paraqitura nga të gjithë operatorët. Kështu, në vendimin e publikuar me 20 shtator, KPP i ka kërkuar Enkelejd Jotit që të rishikojë menjëherë në zbatim pjesën e kërkesave të ankimuesit. Ndërsa ka bërë me dije se do të vazhdojnë hetimet për pjesën tjetër të shkeljeve të pretenduara nga ankimuesi.
Shkeljet e evidentuara
Në dokumentin e ankesës të publikuar edhe më herët nga Gijotina.com tregohet qartë se ky tender është hartuar në kundërshtim me ligjin dhe vlera për 11 milionë lekë ishte e paracaktuar për një nga miqtë e Enkelejd Jotit.
Konkretisht, në ankesë thuhet se, RTSH si Autoritetet Kontraktor në këtë rast kërkon që kompania të dërgojë mallrat e kërkuara brenda një muaji nga dita që është nënshkruar kontrata. Por në fakt me shpjegime teknike dhe sqaruese, ankimuesi shprehet se mallrat e kërkuara janë materiale të cilat kërkojnë përpunim të veçantë dhe të kujdesshëm, prandaj është e pamundur të prodhohen dhe shpërndahen brenda një muaji. Sidomos, në afatin 30 ditë është e vështirë të sigurohet i gjithë materiali i parë i nevojshëm. Prandaj, ankimuesi akuzon drejtorin e RTSH se e ka hapur këtë tender në mënyrë që t’i blejë mallrat ndonjë klient i tij, që i ka këto pajisje stok në magazinë.
“Objekti i kësaj kontrate ka të bëjë me mallra elektronike dhe ekrane vizualimi dhe për këto mallra AK ka caktuar afat lëvrimi 30 ditë nga data e lidhjes së kontratës. Nisur nga eksperienca jonë në këtë fushë, si dhe nga kontaktet me kompanitë vendase ashtu edhe me ato të huaja që merren me tregtimin dhe prodhimin e këtyre lloj pajisjeve, asnjë kompani nuk mund të sigurojë lëndën e parë për prodhim, e jo më t’i prodhojë dhe transportojë këto mallra brenda kësaj periudhë kohore 30 ditë.
Kjo për arsyen se specifikimet teknike janë të veçanta dhe përmbushja e tyre kërkon prodhim nga e para të pajisjeve. Kjo ngre dyshime të forta se specifikimet teknike janë hartuar të tilla që të jenë favorizuese për një operator ekonomik që këto mallra dhe pajisje i ka të gjitha në gjendje në magazinë dhe janë gati për dorëzim”, shprehet ankimuesi.
“START CO” shpk pretendon se qëllimisht RTSH nuk ka dhënë informacion të saktë, që në vlerësimin e ofertave të ketë pika me të cilat mund të kapet dhe skualifikohen kompanitë e tjera.Dhe këto pika janë pranuar nga KPP dhe tashmë edhe nga vetë kreu i RTSH, Enkelejd Joti Në këtyre mënyrë ai “dashur pa dashur” po pranon se i ka futur duart në këtë tender.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post