Ish-ministri i Drejtësisë, Ylli Manjani ka hedhur dritë mbrëmjen e djeshme në Euronews Albania mbi prapaskenat e debatit dhe vendimeve që shoqëruan votimin e Reformës në Drejtësi. Sipas Manjanit, një nga elementët kyç, dhe ndoshta më i diskutueshmi, ishte garancia e dhënë se liderët kryesorë të politikës nuk do të prekeshin nga kjo reformë.
Manjani ka deklaruar se Donald Lu, ish-ambasadori amerikan në Tiranë, kishte siguruar se “nuk do të preken liderët e politikës”. Më tej, ai tregon se vetë ai kishte përgatitur një nen të posaçëm në draftin e reformës që pasqyronte këtë garanci.
Megjithatë, Manjani thekson se ishin vetë politikanët ata që kundërshtuan një nen të tillë, sipas tij, për arsye imazhi politik. “Berisha ka dalë i pari, ka thënë ‘jo’, Basha pas tij dhe Rama më pas ka thënë: ‘S’keni frikë ju, e heqim’,” rrëfen Manjani, duke sugjeruar se refuzimi ishte një lojë strategjike për të ruajtur një pamje publike të integritetit.
Për Manjanin, cilësia e ligjeve të reformuara është shumë e dobët dhe, me kalimin e kohës, ajo rezultoi se ishte një mjet për të fuqizuar pozicionin e Kryeministrit Edi Rama. “Koha tregoi që Reforma në Drejtësi ishte një mjet për të fuqizuar Edi Ramën. Në qoftë se, cilido që është në qeveri dhe merr drejtësinë e ndryshuar, e merr si mjet këtë dhe e përdor. Politika është imazh dhe në fund të ditës Rama e ka pasur kartë këtë në fushatë,” shpjegoi juristi.
Ai theksoi ngarkesat politike të liderëve të atëhershëm: Meta kishte ngarkesa me video, Berisha me të shkuarën, dhe Basha që kishte qenë i pandehur. Këto prapaskena sugjerojnë se, pavarësisht retorikës publike, interesat politike mund të kenë peshuar më shumë se parimet e reformës.
Discussion about this post