Legjenda e Real Madridit, Marcelo, ka lënë mënjanë rivalitetin duke pranuar se Lionel Messi është një lojtar i jashtëzakonshëm dhe kundërshtari më i vështirë me të cilin është përballur gjatë karrierës së tij.
Mbrojtësi i majtë brazilian përfundoi një periudhë 15-vjeçare në Santiago Bernabeu në vitin 2022 kur i dha lamtumirën Madridit si lojtar i lirë. Pjesa më e madhe e kohës së tij në kryeqytetin spanjoll kaloi në konkurrencë të drejtpërdrejtë me ikonën e Barçës, Messi, me rrugët e tyre të kryqëzuara rregullisht në ndeshjet më të ashpra të El Clasicos.
Marcelo pranon se përballja me shtatë herë fituesin e Topit të Artë i paraqiti atij sfidën më të madhe, me argjentinasin që shpesh ishte e pamundur të ndalej ndonjëherë.
Marcelo për The Athletic ka thënë: “Messi është i jashtëzakonshëm, kundërshtari më i vështirë me të cilin jam përballur ndonjëherë. Të gjithë e dimë për cilësinë që ai ka edhe tani, në moshën 35-vjeçare, dhe më parë ishte e njëjta gjë. El Clasico ka qenë gjithmonë një nga lojërat më të mira për t’u parë dhe luajtur. Unë isha mjaft me fat që u paraqita në një nga periudhat më të mira të Clasicos. Por nuk ishte vetëm Messi, kishte edhe lojtarë të tjerë që ishin gjithashtu të jashtëzakonshëm.”
Ndërsa Marcelo ishte rival i Messit, ai ishte shok skuadre yllin portugez Cristiano Ronaldo për nëntë vite të paharrueshme. Dyshja krijuan një lidhje të ngushtë gjatë kohës së tyre së bashku në Madrid, me veprimet e tyre në fushën stërvitore që shpesh zbukuronin rrjetet sociale. Marcelo për Ronaldon u shpreh: “Kishte shumë video të Cris me mua duke bërë shaka në stërvitje, në festë (“Siuuuh!”) e kështu me radhë, gjithashtu Sergio Ramos, Casemiro, Luka Modric, Karim Benzema… Kam shumë miq në futboll. Sigurisht, ajo që doli në rrjete sociale ishte gjithmonë për Cristianon dhe festën dhe është super normale, por kam edhe miq të tjerë me të cilët bëj gjëra jashtë futbollit.”
Pas largimit nga Real Madridi i veteranit brazilian, ai karrierën e vazhdoi në kampionatin grek te Olympiacos, por kjo eksperiencë zgjati shumë pak dhe tani ai është kthyer te klubi i fëmijërisë te Fluminense në Brazil.
Discussion about this post