Ministri i Brendshëm, Bledi Çuçi ka zbuluar detaje të marrëveshjes mes Britanisë së Madhe dhe Shqipërisë për migracionin e parregullt.
Nga foltorja e Kuvendit, ministri tha se kjo marrëveshje ka të bëjë me ngritjen e një protokolli të përbashkët pune për emigracionin e paligjshëm, shkëmbimin e pikave të kontaktit, kalimin tranzit të vendeve të treta dhe personat pa shtetësi të cilët janë subjekt kthimi ose ripranimi në Mbretërinë e Bashkuar ose në Irlandë.
“Fenomeni i migracionit ndikon në pasigurinë e vendeve fqinj dhe vendeve të Bashkimit Evropian. Në marrëveshje janë parashikuar rregulla në lidhje me bashkëpunimin për luftën ndaj emigracionit të paligjshëm. Për realizimin e marrëveshjes palët do të lidhin një protokoll zbatimi, e cila do të përcaktojë rregulla mbi përcaktimin e autoriteteve kompetente, pikat e kalimit kufitar, shkëmbimin e pikave të kontaktit, kalimin tranzit e vendeve të treta dhe personat pa shtetësi. Marrëveshja parashikim identifikimin e personave subjekt kthimi ripranimi duke komunikuar çdo informacion vetëm për qëllim të zbatimit të kësaj marrëveshjeje. Shërbimet kompetente të policive kufitare do të rrisin bashkëpunimin në fushën e menaxhimit të situatave migratore të parregullta që do të konsistojë në analizimin e flukseve migratore, shkëmbimin operacional të informacionit dhe do të krijohen praktika të reja me asistencë reciproke në fushën e migracionit të paligjshëm”, tha ministri Çuçi.
Sipas Çuçit, me nënshkrimin e kësaj marrëveshjeje Shqipëria dhe Britania do të forcojnë bashkëpunimin dhe rritin sigurinë e brendshme.
Discussion about this post