Pas një kohe të gjatë ka përfunduar edhe shitja klubit të futbollit, Vllaznia e Shkodrës.
Ky lajm është bërë publik nga Bashkia e Shkodrës përmes një postimi në faqen zyrtare në rrjetet sociale.
Më 11.05.2021 Bashkia e Shkodrës kishtë organizuar një ankand për shitjen e klubit Vllaznia, ku fitues u shpall kompania ‘Albasport&Entertaimnent ShPK& Albaphoto ShPK’, e përfaqësuar nga Alban Xhaferi.
Komisioni i Prokurimit Publik e ka shpallur të vlefshëm këtë fitues, duke mos pranuar ankimin e kompanisë “Almiro Gurakuqi&Carpathia Albania ShPK’, dhe sot i ka kthyer zyrtarisht përgjigje Bashkisë së Shkodrës, duke e konsideruar zhvillimin e ankandit të rregullt dhe në përputhje me ligjet në fuqi.
“Komisioni i Prokurimit Publik (KPP) ka sjellë zyrtarisht në Bashkinë e Shkodrës përgjigjen përfundimtare për procesin e ankandit të KF Vllaznia sh.a.
KPP ka lënë në fuqi vendimin e Autoritetit Shitës – Bashkia e Shkodrës, duke çertifikuar të gjitha etapat e procedurës së ndjekur për ankandin e KF Vllaznia sh.a.
Që në ditën e parë të shpalljes, ka qenë një proces ligjor, transparent dhe në komunikim me publikun. Janë respektuar me rigorozitet ligjet dhe aktet e tjera ligjore që rregullojnë procedurat e ankandit në Shqipëri.
Tashmë, pas vendimit të KPP, ankandi i KF Vllaznia sh.a. po shkon drejt përmbylljes, duke shënuar privatizimin e parë në Shqipëri për një klub futbolli.
Jemi krenarë që Vllaznia jonë është përsëri e para edhe në ketë procedurë. Falenderojmë të gjithë pjesëmarrësit që kanë treguar interes për një emër të madh siç është Vllaznia jonë.
Klubi kuqeblu përgatitet të nisë një fazë të re të aktivitetit, duke u administruar ashtu si të gjitha klubet e tjera të suksesshme në vend e botë. Siç kemi konfirmuar edhe më herët, si një emblemë identifikuese e Shkodrës, shkodranëve e mijëra tifozëve, Bashkia Shkodër do të vazhdojë të kontribuojë për Vllazninë e futbollit, siç edhe për të gjitha sportet.
Në fund, një falenderim për tifozët e mrekullueshëm kuqeblu, të të gjitha kohërave, kudo ku ndodhen. Mbështetja e tyre edhe gjatë procesit të ankandit, është një vlerë shtuar e qendrueshme për Vllazninë dhe sukseset e saj,”- shkruhet në njoftimin e Bashkisë së Shkodrës.
Kjo nënkuton që sezonin 2021-2021 të Superligës skuadra kuqeblu e Vllaznisë, do të ketë president të saj ligjitim, ish-donatorin Alban Xhaferi, i cili do të jetë edhe pronari i klubit shkodran./Gijotina.com
