Protesta kundër qeverisë në Tiranë vijoi edhe këtë mbrëmje, duke shënuar ditën e saj të 44-t radhazi. Pas grumbullimit dhe fjalimeve të mbajtura përpara Kryeministrisë, mijëra qytetarë marshuan në rrugët kryesore të kryeqytetit.
Gjatë marshimit, protestuesit brohoritën slogane kundër qeverisë dhe u bënë thirrje qytetarëve që ndodheshin përgjatë itinerarit t’u bashkoheshin protestës.
Një nga momentet që tërhoqi vëmendje ishte ironizimi i deputetes së Partisë Socialiste, Zegjine Çaushi.
Protestuesit brohoritën në kor thirrjen “Zegjine gëk-mëk”, duke e përdorur si slogan gjatë marshimit.
Manifestimi u zhvillua nën masa të shtuara sigurie, ndërsa deri në përfundim të tij nuk u raportuan incidente të rëndësishme.
Organizatorët kanë deklaruar se protestat do të vijojnë edhe në ditët në vijim, duke këmbëngulur në kërkesat e tyre politike dhe duke paralajmëruar vazhdimin e mobilizimit qytetar.
Discussion about this post