Trajneri i skuadrës së Teutës, Edi Martini ka theksuar pas ndeshjes me Kastriotin se lojtarët luajtën mirë përveç rastit kur pësuan gol. Në lidhje më ndërhyrjet në merkato ai u shpreh se vlerësimet bëhen në merkaton e janarit.
“Është gjynah që humbëm dy pikë, pasi kontrolluam lojën gjatë gjithë kohës dhe patëm mundësi të mbyllim ndeshjen, por nuk ia dolëm. Më pas erdhën ato dy minuta lojë, ku lëshuam gjithçka dhe duhet të ndalemi gjatë për ta analizuar, pasi mund të na kishin kushtuar edhe më shtrenjtë.
Gruda është i ri dhe po rritet gjithmonë e më shumë, por ne jemi ekip dhe funksionojmë si grup. Mendoj se bëmë mirë, por duhej të tregoheshim më të saktë në finalizim, për të mbyllur ndeshjen. Shkojmë shumë mirë deri në 30-metërshin e fundit, por aty kemi vështirësi, qoftë në pasimin e fundit, qoftë në finalizim.
Mendoj se këtu duhet të punojmë shumë, për të rikuperuar këtë problem. Koubemba nuk është në formën më të mirë dhe unë tani nuk mund të them nëse jemi apo jo të kënaqur me sulmuesit, pasi vetëm në janar do të bëjmë bilancet. Me shumicën e lojtarëve jam i kënaqur, por analizat do t’i bëjmë më vonë”, tha Martini.
