Kryetarja e Komisionit për Punën, Çështjet Sociale dhe Shëndetësinë, Albana Vokshi nisi ditën e sotme mbledhjen duke iu bërë një ftesë ministres së Arsimit Evis Kushi dhe asaj të Shëndetësisë Ogerta Manastirliu për të qenë të pranishme në Komision dhe bërë publike masat që janë marrë në shkolla.
Vokshi u shpreh se do duhet që dy ministret të raportojnë gjendjen në të cilën ndodhen institucionet arsimore pasi ka shqetësime nga prindërit e nxënësve për situatën aktuale.
“Të bëjmë një dëgjesë të përbashkët për masat që janë marrë nga Ministria e Shëndetësisë dhe e Arsimt. Të ftohet ministrja e Arsimit dhe e Shëndetësisë për dëgjesë. Kjo është çështje që është prekur nga prindërit, pasi nuk janë marrë masat në shkolla, duke nisur që nga higjena. Nëse ju jeni dakord e vendosim në axhendë në javën e ardhshme. Do bëjmë një kalendar, do bëjmë propozimet që ta vendosim javën që vjen. Të gjithë ju jeni në dijeni të peticionit që bënë prindërit. A janë marrë masat brenda këtyre ditëve, cfarë masash janë marrë? Kjo çështje i përket të gjithëve, nuk i përket vetëm PS apo PD. Janë dhënë porosi që asnjë mësuesi të mos bëhet testi por të shkojnë në klinika private”, u shpreh Vokshi.
Ndër të tjera, në Komision u diskutua dhe për vaksinat që vendi ynë ka arritur të sigurojë me kompaninë Pfizer për vaksinat. Deputetja e PS, Klodiana Spahiu, tha se qeveria ka përfunduar një marrëveshje për afrimin e 500 mijë dozash vaksinash Pfizer, ndërsa shtoi se popullata duhet të vaksinohet në mënyrë që të përballojë virusin.
“Ne kemi kaluar një sërë aktesh në parlament. Besoj që me furnizimin e mëtejshëm të mbi 500 mijë dozave të tjera të Pfizer do të arrijmë objektivin e vendosur nga ministria që brenda marsit popullsia target të jetë e vaksinuar. Duhet që popullata të vaksinohet se vetëm kjo bën të mundur uljen e rasteve të rënda. Duhet të jemi promotor të këtij procesi dhe duhet të merremi vesh me njëri-tjetrit, sepse do ia dalim mbanë kësaj pandemie. Shumë shpejt nis dhe gripi sezonal dhe ne duhet të bindim ato që janë të pavaksinuar të vaksinohen, edhe ata që kanë marrë një dozë dhe do të jetë vendim i Komitetit të Ekspertëve për dozën tretë. Duhet bërë kjo dozë, pasi ka grupe të rriskuara, si personeli mjekësor dhe mësuesit“, tha Spahiu.
Deputetja shtoi se brenda marsit, do të vaksinohet e gjitha popullsia target, ashtu siç është parashikuar më herët.
