Situata në pikën kufitare të Muriqanit është e qetë, pavarësisht se fluksi i automjeteve që qëndrojnë në radhë është shtuar, pas hyrjes në fuqi të masave të reja anti-Covid.
Mësohet se, rreth 460 persona e kanë kaluar kufirin gjithsej dhe kanë hyrë në Shqipëri, nga të cilët 99 janë shqiptarë. Në pikën e Muriqanit personat që duan të kalojnë kufirin, ose duhet që të jenë të pajisur me certifikatën e Covid, tesin PCR ose vërtetim që e kanë kaluar Covid.
Ndërsa për personat që nuk e kanë dokumentacionin e rregullt duhet ose të plotësojnë formularin e karantinimit për 10 ditë ose të bëjnë testin e shpejtë aty në pikën kufitare. Deri tani në Muriqan janë plotësuar 23 formularë për karantinimin 10 ditor.
Ditën e sotme hynë në fuqi masat e reja anti-Covid të vendosura nga Komiteti i Ekspertëve më 30 gusht, pas rritjes së infektimeve dhe shtimin e personave që këkojnë trajtim të specializuar.
Rregullat e reja:
Duke filluar nga data 6 Shtator, qytetarët të cilët hyjnë në Republikën e Shqipërisë nga të gjitha pikat kufitare duhet të plotësojnë një nga këto tre kushte:
-Të kenë pasaportën e vaksinimit, ku nga data e vaksinimit të plotë të kenë të paktën dy javë.
-Të kenë testin PCR negativ brenda 72 orëve ose testin e shpejtë të antigenit brenda 48 orëve.
-Të kenë provë të kalimit të infeksionit Sars-Cov2, të vlefshme deri në 6 muaj pas shërimit.
Këto rregulla janë të vlefshme edhe për ata qytetarë të cilët kalojnë tranzit në Shqipëri. Fëmijët deri në 6 vjeç nuk i nënshtrohen këtyre rregullave
Qytetarët shqiptarë rezidentë në Shqipëri, të cilët kthehen dhe nuk kanë një nga dokumentat e sipërcituara, duhet të vetëizolohen për 10 ditë dhe të informojnë autoritetin shëndetësor për të kryer një test në fund të periudhës së izolimit.
