Masat e reja anti-Covid që hynë në fuqi ditën e sotme në Malin e Zi, kanë shkaktuar radhë të gjata automjetesh në pikën kufitare të Hanit të Hotit.
Burime për Gijotina.com shprehen se radha kilometrike ka nisur që në orën 06:30 të mëngjesit, pasi Mali i Zi nuk lejon kalimin e qytetarëve shqiptarë pa pasur dokumentet e nevojshme, duke shkaktuar dhe përplasje me policinë.
Sipas njoftimit zyrtar nga ministria e Jashtme, të gjithë qytetarët e huaj që duan të udhëtojnë drejt Malit të Zi duhet të pajisur më një vërtetim që kanë kaluar 14 ditë nga rivaksinimi, për vaksinat që jepen me dy doza, ose kanë kaluar 14 ditë nga vaksinimi për vaksinat që jepen me një dozë.
Nëse nuk janë të vaksinuar, duhet të kenë një test PCR negativ Covid-19 jo më të vjetër se 72 orë, ose testin pozitiv PCR nga i cili kanë kaluar të paktën 14 ditë, por jo më shumë se 180 ditë, dhe test negativ antigjen, jo më të vjetër se 48 orë.
Si të mos mjaftonin masat e reja, probleme ka dhe me vaksinat e injektuara, pasi sipas qytetarëve, autoritetet malazeze nuk njohin vaksinën “Pfizer” që kanë bërë dhe u kërkojnë të bëjnë teste të tjera çdo ditë.
Sipas tyre kjo ishte një kosto e papërballueshme dhe kërkojnë një zgjidhje nga qeveria, pasi janë rreth 600 persona që punojnë në Mal të Zi çdo ditë.
“Nuk mund të kaloj në Mal të Zi, ne i kemi bërë këto vaksinat që na ka dhënë shteti shqiptar. Por nuk po pranohen vaksinat që kemi bërë. Na thonë që duhet të kemi edhe kodin personal. Unë kam bërë vaksinën Pfizer. Unë siç kam kaluar në Kosovë ashtu kam ardhur të kaloj dhe në Mal të Zi po nuk na lejojnë. Kemi qenë rreth 600 persona, shkuam të fitojmë bukën e gojës, erdhi shteti i atyre dhe i joni po nuk gjetën zgjidhje.
Na kërkojnë nga 23 euro për të bërë testin. Kërkojmë nga dogana shqiptare dhe nga kryeministri që të na lirojë rrugën të qarkullojmë si më parë”, u shpreh ai.
