Pas afro dy javësh rreth 33 mijë maturantë në të gjithë vendin do t’i nënshtrohen procesit më të rëndësishëm për mbylljen e shkollës së mesme dhe hyrjen në universitet.
Provimet e Maturës Shtetërore nisin me 3 qershor me testin e gjuhës së huaj, vijojnë me gjuhën shqipe e letërsinë dhe matematikën më 7 dhe 11 qershor dhe përfundojnë me lëndët me zgjedhje me 15 të po këtij muaji.
Tezat ndryshe nga vjet, nuk do të përmbajnë vetëm pyetje me alternativa. Sipas Drejtoreshës së Qendrës së Shërbimeve Arsimore, Rezana Vrapi, këtë vit do të rikthehen pyetjet me zhvillim.
“Kjo do të krijojë një lloj shtendosjeje nga ana e nxënësve pasi dihet që pyetjet me alternativa në një lloj mënyre mund të të penalizojmë. Pyetjet me shtjellim, edhe nëse jep të plotë idenë, ke mundësi të marrësh pikë…”
Megjithëse për shkak të pandemisë mësimi u zhvillua më shumë online se në klasë në provime nuk do të mungojnë pyetjet e vështira.
“Në disa programe studimi, kuotat janë të kufizuara por edhe konkurrenca është e lartë. Grupi i nxënësve që konkurron atje janë shumë të mirë…Prandaj që patjetër në tezë do të ketë pyetje të nivelit të lartë, për të bërë mundësi që nxënësit e 9-10 të dallojnë.”
Në prag të testit të parë Drejtoresha e Qendrës së Shërbimeve Arsimore ka një këshillë për maturantët.
“Mundësi për t’u familjarizuar me natyrën, është përmes testeve tona që janë publike në faqen e QSHA. Nëse ata bëjnë secilin nga këto teste, do të ndihem shumë më mirë në provimin e maturës, sepse nuk do të jetë një gjë e befasishme.”
Provimet e Maturës Shtetërore do të mbahen sipas protokolleve anti Covid ndërsa nxënësit që në atë periudhë rezultojnë të infektuar janë të detyruar ti japin ato në sezonin e vjeshtës.
