Mbahen sot zgjedhjet për President të FFK-së, Agim Ademi kandidat i vetëm në garë

Kuvendi Zgjedhor i Federatës së Futbollit të Kosovës do të mbahet sot, duke filluar nga ora 11:00 në selinë e FFK-së në Prishtinë.

Agim Ademi është kandidati i vetëm për kryetar pasi i siguroi pjesën dërrmuese të votave duke mos i lënë  vend kandidimeve të tjerë, të cilët nuk u treguan të aftë për t’i siguruar 15 votat e nevojshme për kandidim.

Me këtë rast, kreu aktual i FFK-së do ta marrë edhe një mandat katërvjeçar, të dytin për të. Natyrisht, atij i nevojiten 2/3 e delegatëve në Kuvendin e sotëm, të paralajmëruar vetëm një muaj më parë.

Kujtojmë se këtë herë Ademi është përballur me një opozitë të fortë,  e cila e konsideron si të parregullt dhe të paligjshëm këtë Kuvend Zgjedhor.

Sidoqoftë, përkundër përpjekjeve, këto klube që mendojnë ndryshe nuk ia dolën ta shtynin Kuvendin, i cili me rregull është dashur të mbahet në muajin korrik, kur edhe do të plotësoheshin katër vjet të mandatit të Ademit në krye të këtij institucioni. Klubet opozitare nuk dihet nëse do të marrin pjesë në Kuvend.

Gramoz Vokrri iu mohua e drejta e kandidimit pasi FFK-ja konsideroi se disa prej nënshkrimeve i kishte të pavlefshme. I biri i legjendës Fadil Vokrri, si prijës i klubeve opozitare, shpreson që sot të mos ketë delegatë të mjaftueshëm për konfirmimin për një mandat tjetër të Ademit.