Me përfundimin e pushimeve për festat e fundvitit, nxënësit do të rikthehen ditën e nesërme në shkolla. Ministrja e arsimit Evis Kushi ka dalë me një mesazh për të gjithë nxënësit që do të rikthehen në bankat e shkollave pas pushimeve për festa. Ministrja me anë të një mesazhi në rrjete sociale nuk ka harruar t’iu rikujtojë masat anti-covid dhe higjienën, pasi për të prezenca fizike në ambientet e shkollës kërkon kujdes dhe përgjegjësi.
“Të dashur nxënës, shpresoj të keni kaluar festa e pushime të gëzuara, e të keni mbledhur plot energji që nesër t’u riktheheni shkollave plot dëshirë e pasion për të mësuar më shumë. Rikthimi në shkollë ju bën bashkë me shoqet, shokët, mësuesit, të kaloni çaste të bukura por edhe të mbështesni më shumë njëri-tjetrin. Ndërkohë dua t’ju kujtoj edhe një herë që të kemi kujdes të shtuar për higjienën dhe të gjitha masat kundër pandemisë. Shkollat e hapura dhe mësimi në prezencë fizike kërkon vëmendjen dhe përgjegjësinë e të gjithëve bashkë. Ju uroj shumë suksese dhe vit të mbarë!‘
Pushimet e festave të fundvitit filluan në 24 dhjetor dhe këshilla e Kushit vjen një ditë para se nxënësit e shkollave fillore dhe shkollat e mesme të rifillojnë mësimin në 5 Janar. Ndërkohë mësimi në universitete për Bachelor dhe Master do të fillojë në 10 Janar.
Discussion about this post