Mbështetës të Lulzim Bashës kanë nisur një seri sulmesh ndaj Gazment Bardhit, i cili sot arriti të mbledhë në një tryezë 43 deputetë të opozitës, pavarësisht grupimeve ku ata bëjnë pjesë, për të unifikuar qëndrimin kundër Qeverisë Rama.
Tryezës nuk iu bashkuan deputetët e PDIU-së, por edhe ata që konsiderohen si PD zyrtare apo e vulës, e cila drejtohet nga Lulzim Basha.
Arbi Agalliu, një prej deputetëve që mbështet Bashën, ka reaguar për tryezën e thirrur nga Bardhi, ndërsa në vëmendje ka sjellë pikërisht akuzat që Sekretari i Përgjithshëm i PD-së i bënte Sali Berishës.
Agalliu shprehet se dje mendonin dhe artikulonin faktin se non grata me qeverinë ndanin pushtet, kulla dhe para, ndërsa sot ulen përballë njëri-tjetrit.
“Çfarë ka ndryshuar sot për disa kolegë? Deri dje ishin të vendosur për të mbështetur qendrimet e aleatëve strategjikë si SHBA, BE dhe Britani e Madhe.
Deri dje mendonin dhe artikulonin faktin se non grata me qeverinë ndanin pushtet, kulla dhe para.
U akuzuan me njëri tjetrin si vrasës, babi i x apo y, përfaqësues oligarkësh, etj. Sot çfarë ndryshoi?
Sot u ulen përball njëri tjetrit dhe bënë sikur nuk ka ndodhur asgjë.
Nuk të bënë opozitar të ulesh në hollet e hoteleve por së pari të mos jeshë i damkosur për korrupsion nga SHBA dhe Britani e Madhe apo të mos përflitesh (edhe me fakte) për biznese të pa ligjshme me qeverinë.
Nuk luftohet korrupsioni me ish të korruptuar!
Ndaj, çfarë ndryshoi?”, shkruan Agalliu në rrjetin social.
Ndërkohë, në një intervistë për Euronews Albania, Taulanta Jupi, anëtare e Kryesisë së PD-së që drejtohet nga Basha, tha se kundër Edi Ramës mund të luftohet vetëm me moral politik.
Në vijim ajo i kërkoi Gazment Bardhit që të bëjë publike cilët ndërkombëtar ka takuar, çfarë i kanë thënë ata dhe cilët e kanë udhëzuar që të bashkëpunojë me Sali Berishën, i shpallur “non grata” nga SHBA.
“Ky moral politik nuk është duke iu ofruar shqiptarëve, përballë një të korruptuari, ca të korruptuar të tjerë, apo ca të tjerë të shpallur non grata. Shqiptarët nuk do të zgjedhin më të keqen më të vogël.
Po e shikojmë nga zgjedhjet në zgjedhje se numri i shqiptarëve që besojnë te politika po bie gjithnjë e më tepër.
Kjo do të thotë se shqiptarët po refuzojnë një opozitë që kërkon bashkimin, kërkon forcën opozitare pikërisht te numrat.
Forca opozitare sot duhet gjetur te vlerat. Partia Demokratike ka qëndruar në një betejë të rëndësishme me vetveten. Nuk është kaq e thjeshtë të luftosh dhe të këpusësh zinxhirin 32-vjeçar të një politike që ka refuzuar të qarkullojë elitën e saj, ka refuzuar të sjellë në krye të vendit njerëz të vlefshëm për ta drejtuar Shqipërinë drejt së ardhmes”, u shpreh Jupi.
Discussion about this post