Mbi 770 raste të reja me Covid-19 në Kosovë, asnjë viktimë

Ministria e Shëndetësisë në Kosovë, njofton se janë regjistruar 771 raste të reja me koronavirus, pas testimit të 6 mijë e 553 mostrave.

Sipas ministrisë, në 24 orët e fundit nuk është regjistruar vdekje nga COVID-19. Autoritetet shëndetësore kanë njoftuar edhe se 119 persona janë shëruar, ndërsa 4.489 persona janë ende raste aktive me koronavirus.

Kosova ka nisur fushatën e vaksinimit kundër koronavirusit në mars të vitit të kaluar. Prej atëherë janë dhënë mbi 1.7 milion doza të vaksinës. Qytetarët në Kosovë mund të marrin vaksina të kompanive: Pfizer/BioNTech dhe AstraZeneca, ndërsa doza përforcuese e vaksinës mund të merret pas tre muajve të marrjes së dozës së dytë.