Kryedemokrati Sali Berisha, pas mbledhjes së deputetëve demokratë, dhe atyre të partive aleate, u shpreh se grupimi i 43 deputetëve të opozitës do t’i kallë datën Edi Ramës.
Berisha theksoi se kjo mbledhje ishte hap i rëndësishëm në një proces të pandalshëm, ndërsa shtoi se “do i japë përgjigje problemeve që u krijuan”.
“Ky ishte një takim i 43 deputetëve të dalë nga zgjedhjet e 25 prillit, deputetët të Partisë Demokratike me aleatët e saj të përjetshëm.
Besoj se ishte një mesazh shumë pozitiv dhe një përgjegjësi në të cilën deputetët vendosin të bashkojnë të gjithë përpjekjet e tyre kundër një regjimi që është sot thagmë e krimit dhe e vjedhjes dhe e të zezave më të mëdha që ka njohur kombi.
Mendoj që ky ishte një hap i parë shumë i rëndësishëm në një proces të pandalshëm që do i jap zgjidhjen më të mirë të gjitha problemeve. Ky ishte një takim i 43 deputetëve të dalë nga një aleancë opozitare dhe që vendosën t’i kallin datën dhe tmerrin Edi Ramës. Asgjë më të moralshme nuk ka se sa betejë ndaj Edi Ramës që po shkretëton Shqipërinë.
Janë 620 mijë opozitarë që sot marrin frymë lirisht dhe me optimizëm, sot për ta çelet horizont i ri në betejën kundër regjimit.
Këtu nuk ishin sot deputetët e Partisë së Lirisë që janë opozitarë të vendosur. Sot ftoj çdo deputetë të bashkojë forcat për një fitore të sigurt”, tha Berisha.
Discussion about this post