Pas dekretimit në Presidencë, Rama dhe 16 ministrat e kabinetit, kanë nisur mbledhjen e parë të qeverisë se re. Sipas protokollit, fjalën e ka marrë kryeministri Rama i cili i njohu menjëherë me Kodin Etik që duhet të respektojnë ministrat, përfshirë ndalimin e udhëtimeve të luksit, dhuratat, apo përdorimi i makinës së punës.
“Kodi Etik është miratuar si një dokument parimesh që përcaktojnë vijën e sjelljes së anëtarëve të qeverisë. Unë do të shënoj disa pika kyçe të thëna në dokumentin e miratuar. Fjala që do të dëgjoni është rrjedhojë e eksperiencës. Qytetarët na kanë besuar shërbimin e vendit. Aty nuk shkruhet as që anëtarët e qeverisë të udhëtojnë me “Business Class”, apo të shkojnë në udhëtime jashtë vendit, apo të pinë kafe, apo për dreka dhe darka. Këtu se kam fjalën kur ministrat janë jashtë me punë. Për dy të parat, për udhëtimet dhe pushimet janë zbatuar. Kohë më parë politikanët shëllëheshin me pushime jashtë. Do përcaktuar në aneksin e Kodit Etik se bashkëshortët e anëtarëve të kabinetit, s’mund të përdorin sallën e vipave në aeroportin e Rinasit. Po ashtu ndalohet dhe përdorimi i makinës së ministrit nga familjarët. Për fat të keq pirja e kafeve, nuk është zbatuar”.
Rama tha se nëse evidentohen shkelje të Kodit Etik nga ana e ministrave, këta do të duhet të kërkojnë falje publike. Por në rast se ata e përsërisin një shkelje, do të duhet të japin dorëheqjen.
“Të gjithë qytetarët duhet ta dinë, qeveria ka një Kod Etik. Dua ta bëj me dije se në rastin e parë të mos respektimit të kodit etik, ministri përgjegjës të kërkojë ndjesë publike dhe në rast të përsëritur do të duhet të largohet. Kjo bën fjalë edhe për mua. Se kam problem që ta respektoj dhe 4 vite të tjera. Po ashtu, një tjetër gjë që sqarohet është dhe çështja e dhuratave. Sot kryeministria ka një magazinë për dhuratat, nga medalionet, deri te dhuratat me vlera të larta monetare. Deri në 2013-ën nuk lanë në këtë godinë asnjë dhuratë protokollare, a thua se këtu ka qëndruar një fuqi pushtuese që ka marrë çdo gjë”, tha Rama.
“Rama 3” u miratua me 77 vota pro në Kuvend mëngjesin e djeshëm, pas një seance maratonë diskutimesh, ku u prezantua programi i ri qeverisës për katër vitet e ardhshme.
