Mbyllen Lojërat Olimpike, SHBA mund Kinën në tabelën e medaljeve – Klasifikimi

Gara për më së shumti medalje të arta në Lojërat Olimpike në Paris mbaroi me barazim 40:40 mes Shteteve të Bashkuara dhe Kinës.

Megjithatë, SHBA-ja kryesoi tabelën e medaljeve pasi fitoi 126 medalje olimpike në përgjithësi, duke lënë mbrapa Kinën me 91 medalje.

Edhe në lojërat e kaluara në Tokio, SHBA-ja e la pas Kinën në garë për numrin e përgjithshëm të medaljeve, duke fituar 113 në total, prej të cilave 39 të arta, krahasuar me 89 në total nga Kina dhe 38 të arta.

Kush pritej të fitonte më së shumti medalje në Paris?

Sipas parashikimit virtual të Nielsen Gracenote, i cili i mblodhi të dhënat e rezultateve nga garat e mëdha prej Olimpiadës së Tokios e këndej, pesë vendet me më së shumti medalje në Paris do të ishin si në vijim: SHBA (112 medalje në total); Kina (86); Britania (63); Franca (60) dhe Australia (54).

SHBA-ja doli e para siç u parashikua. Megjithatë, SHBA-ja dhe Kina fituan më shumë medalje të arta dhe medalje në përgjithësi.

Japonia i theu parashikimet dhe doli në vendin e tretë me 45 medalje në përgjithësi, prej të cilave 20 të arta.

Franca dhe Australia u renditën në top pesëshe, siç u parashikua.

Australia, megjithatë, doli e katërta, para Francës, falë 18 medaljeve të arta nga 53 medalje në total që fitoi. Franca fitoi më shumë në total, 64, por kishte vetëm 16 të arta.

Britania fitoi më shumë medalje se në Tokio, 65 krahasuar me 64, por fitoi më pak të arta dhe u rendit e shtata në klasifikimin e përgjithshëm, mbrapa Holandës.

Në Paris, Kosova e rriti numrin e medaljeve në pesë në total, ndërsa Shqipëria fitoi medaljet e para në historinë e saj. Por, as Kosova e as Shqipëria nuk fituan medalje të arta.

Te Kosova, kampionia olimpike nga Tokio, Distria Krasniqi fitoi medaljen e argjendtë, duke u bërë sportistja e parë kosovare, qoftë te djemtë apo vajzat, që fiton dy medalje olimpike. Ndërsa xhudistja tjetër, Laura Fazliu, e fitoi medaljen e bronztë, të parën në karrierë.

Chermen Valiev dhe Islam Dudaev fituan për Shqipërisë medaljet e para olimpike, pasi të dy fituan të bronzta në sportin e mundjes.

/rel/