Komedia “Vendi më i humbur në Shqipëri” me regji të Andia Xhungës rrëmbeu çmimet më të rëndësishme të Edicionit të 12 të Festivalit Mbarëkombëtar të Komedisë “KoKo Fest” që për 7 net me radhë e ktheu Korçën në kryeqendër të artit të komedisë, duke sjellë në skenë disa prej shfaqjeve më të bukura.
Vepra fitoi jo vetëm çmimet për “Shfaqjen më të mirë”, “Regjinë më të mirë”, dhe Çmimin e Publikut” por u vlerësua edhe për interpretimin e fuqishëm të aktorit protagonist Gentian Zenelaj si aktori më i mirë dhe aktorin e ri më të mirë, Alex Seitaj.
Edhe aktoret Zamira Kita, Olta Daku dhe Egla Ceno u vlerësuan me çmimin “Aktorja më e mirë”. Ky ishte një moment i veçantë për Zamira Kitën, e cila ndau skenën me dy koleget e saj në komedinë “Një martesë, një divorc dhe një funeral”, duke e kthyer vlerësimin në një gëzim të trefishtë.
Po ashtu, regjisori i mirënjohur Gëzim Kame u nderua me çmimin e karrierës, si një vlerësim për kontributin e tij të gjatë dhe të çmuar në skenën shqiptare.
Mbrëmja përmbyllëse e festivalit u mbyll me shfaqjen e Teatrit të Prizrenit “Komedia e Zezë”, duke i dhënë fund këtij edicioni me të qeshura, emocione dhe duartrokitje të gjata.
gijotina.com/
Discussion about this post