Ministria e Kulturës ka njoftuar se nga dita e sotme do të mbyllet Galeria Kombëtare e Arteve, për shkak të projektit që do bëj rikonstruktimin e godinës. Sipas burimeve, për shkak të punimeve do të pezullohet përkohësisht aktiviteti dhe shërbimi muzeor brenda kësaj godine. Ndërsa bëhet me dije se, plani është që Galeria do të qëndrojë e mbyllur për 24 muaj, të paktën aq parashikohet në projektin për rikonstruktim.
Bëhet me dije se, Galeria Kombëtare e Arteve është ngarkuar të marrë masa për transferimin e orendive, pajisjeve, arkivin administrativ pranë ambienteve të Albafilm sh.a. Por aktiviteti i institucionit do të vijojë. Në bashkërendim me Muzeun Historik Kombëtar apo entitete të tjera do të zhvillohen ekspozita të përkohshme dhe programe publike.
Po ashtu, në bashkërendim me Ministrinë e Kulturës dhe Drejtoritë Rajonale Arsimore, do të zhvillohen aktivitete kreative për edukimin e fëmijëve, në institucione arsimore. Periudha e realizimit të punimeve në godinën e GKA do të shfrytëzohet për restaurimin dhe digjitalizimin e fondit artistik dhe arkivave, në bashkërendim me institucionet e specializuara të trashëgimisë kulturore. Mësohet se, një godinë tjetër do i shtohet asaj ekzistuese, në pjesën e pasme, me të njëjtat volume, duke zgjeruar hapësirat e fondit të ruajtjes së veprave të artit, ekspozimit, laboratorëve restaurues, aktivitetit edukues për të rinj e fëmijë e shërbime për vizitorët. Nga 4.600 m2 që është sot, muzeu do të shtrihet në 10.100 m2.
