Ka përfunduar me rrjeta të paprekura pjesa e parë në ndeshjen ndërmjet skuadrës së Partizanit dhe Kukësit, sfidë e cila po zhvillohet në “Air Albania”. Një ndeshje shumë e luftuar nga të dyja skuadrat por që në fundin e 45 minutave nuk ka një fitues. Sfida nisi me një problem teknik ku FSHF njoftoi arbitrin Florjan Lata të vazhdonte lojën pa sistemin VAR që pësoi një problem në startin e ndeshjes. Tekniku i’a komunikoi vendimin dy skuadrave dhe lejoi lojën të vazhdonte. Në harkun kohor të 10 minutave u ndërpren dy aksione për gol për shkak të pozicioneve jashtë loje, vendime këto që erdhën pa konsultime me sistemin VAR.
Më pas ndodhi një ndërprerje e lojës për pak momente pasi në stadium pati një ndërprerje të energjisë elektrike. Në fundin e pjesës së parë duhet veçuar minuta e 44 ku Kukësi pati mundësinë të shënonte golin e avantazhit por kapiteni i të kuqve Alban Hoxha devijoi në këndore një top të rrezikshëm. Të dyja skuadrat e kërkojnë me ngulm fitoren teksa në fraksionin e dytë kanë shansin për të tentuar gjithçka.
