Mbyllet votimi në 5 bashkitë/ Pjesëmarrje tepër e ulët, Vlora “braktis” kutitë

Orari zyrtar i votimit në pesë bashkitë ku u zhvilluan zgjedhjet lokale ka përfunduar në orën 18:00 në Mat, Cërrik, Berat, Vlorë dhe Tepelenë.

Qendrat e votimit u hapën në 07:00 të mëngjesit, ndërsa Komisioni Qendror i Zgjedhjeve (KQZ) vendosi që procesi të përfundojë në 18:00, një orë më herët se zakonisht, për shkak të stinës.

Të dhënat e fundit të KQZ-së tregojnë një pjesëmarrje relativisht të ulët, rreth 17,9%, duke reflektuar interesin e kufizuar të qytetarëve për të marrë pjesë në këto zgjedhje.

Rekord mban qyteti i Vlorës ku nuk kanë dalë të votojnë më shumë se 12.37 për qind e atyre që kishin emrin në listat e votimit.

Ndërkohë pjesëmarrje më të lartë ka pasur Mati, me afro 40%.

Kandidatët në garë

Në garën për zëvendësimin e 5 kryebashkiakëve të zgjedhur deputetë, apo ministër si në rastin e Andis Sallës së Cërrikut janë 13 kandidatë.

Partia Socialiste ka kandiduar Brunilda Mersinin në Vlorë, Ervin Cecën në Berat, Gramoz Sakon në Tepelenë, Florenc Dokën në Cërrik dhe Altin Bojnin në Mat.

Opozita e bashkuar nuk ka paraqitur kandidatë politikë, por ka vendosur të mbështesë kandidatë të pavarur.

Në Vlorë, ajo mbështet Dionis Sotën, ndërsa në garë ndodhet edhe Gjergj Nika, anëtar i Këshillit Bashkiak i zgjedhur në listat e Partisë Demokratike në vitin 2023.

Për Bashkinë e Beratit, opozitarët mbështesin Pavlo Shkarpën, në Tepelenë garon Gabriel Guma, ndërsa në Cërrik janë në garë Amarildo Hoxha (i pavarur) dhe Eligert Hima, përfaqësues i “Lëvizja Shqipëria Bëhet”.

Në Mat konkurrojnë Eduart Brahilika (i pavarur) dhe Suzana Pasha, ish-drejtuesja e Forumit të Gruas në PS.

Fushata e këtyre zgjedhjeve të pjesshme kaloi pa shumë zhurmë dhe as protagonizëm. Nuk pati mitingje dhe as takime elektorale ku të pranishëm të ishin liderët e partive kryesore.