Vendimi i qeverisë italiane për mbylljen e kufijve me Shqipërinë ka shkaktuar probleme tek udhëtarët që do të niseshin nga vendi ynë. Një pjesë e madhe e tyre kanë prerë biletat, por nuk dinë tashmë se çfarë do të ndodhë me prenotimet e tyre. Të vetmit që lejohen janë udhëtarët që shkojnë për arsye pune, shkolle apo urgjencë.
Në lidhje me rimbursimin e biletave, kompanitë e udhëtimit që operojnë në vendin tonë, kanë politikat e tyre të cilat ndjekin.
Njëra nga kompanitë njofton se bileta nuk do të digjet, por do të mund të përdoret në një moment tjetër. Ka dhe kompani të cilat bëjne kthimin pas të parave të paguara.
Sipas operatorëve, zgjidhja më e mirë do të ishte heqja e masave për të lejuar sërish udhëtimet. Muajt nëntor e dhjetor shënojnë fluksin më të lartë të udhëtarëve, por duket se këtë vit, vizitat e tyre do të pezullohen.
