Katër trupa të pajetë janë nxjerrë në breg në zonën pranë ishullit Chios në Greqi, pasi një varkë me 27 emigrantë u mbyt në mëngjes.
Sipas Rojes Bregdetare,viktimat janë tre të mitur dhe një grua, ndërkohë që janë shpëtuar 22 persona (14 burra, 7 gra dhe një fëmijë), poashtu një tjetër është ende i zhdukur. Autoritetet u njoftuan për incidentin në orën 6:10 të mëngjesit, kur pasagjerët thirrën 112 dhe thanë se po fundoseshin.
Mediet greke shkruajnë se menjëherë pas telefonatës, autoritetet kanë bërë një skanim të antenave celulare për të kuptuar se nga cila zonë erdhi thirrja. Fillimisht në vendngjarje shkoi një luftanije Gjermane dhe më pas anijet e marinës greke.
Gomonia kishte një kapacitet prej 10 personash, por në të kishin hipur 27 persona, si pasojë i është shkëputur tërësisht fundi dhe të gjithë kanë rënë në det. Asnjë nga emigrantët nuk kishte veshur jelek shpëtimi.
Operacioni, i cili vazhdon, përfshin dy anije detare, një helikopter super puma, një helikopter të ushtrisë greke, një anije të forcave të NATO-s, tre anije peshkimi dhe tre anije lundruese.
