“Fëmija u fut i gjallë në valixhe”, del ekspertiza për mbytjen e foshnjës në Korçë

Kanë dalë rezultatet e ekspertizës pas ngjarjes së rëndë që tronditi Korçën ku një foshnje u gjet e pajetë në një valixhe në dollapin e shtëpisë

Burime pranë Institutit të mjekësisë ligjore bëjnë me dije se foshnja i gjetur në valixhe i pajetë, ka lindur i gjallë. Mësohet se, ka qenë me shenja jete kur është futur në valixhe nga nëna 40 vjeçare me sëmundje të theksuara të shëndetit mendor.

Mostrat e foshnjës të gjinisë mashkullore u dërguan menjëherë pas zbulimit të ngjarjes drejt Tiranës, ku konfirmohet se foshnja ka lindur i gjallë. Pritet që akti i ekspertimit të mbërrijë në prokurorinë e Korçës për të bërë më pas edhe ndarjen e veprës penale që rëndon mbi Valmira Hasimllarin, mamanë e foshnjes e cila vuan nga probleme të shëndetit mendor.