Transporti i emigrantëve të paligjshëm është kthyer në një fenomen i pashmangshëm. Një tjetër rast është konstatuar në Lezhë, teksa policia ka arrestuar një 27-vjeçar.
Blutë bëjnë me dije se bëhet fjalë konkretisht për të riun me iniciale B.D i cili është kapur duke transportuar 7 emigrantë të paligjshëm drejt vendeve të Bashkimit Evropian, kundrejt pagesës. I riu po udhëtonte me një automjet tip “Volkswagen” drejt Kosovës, kur u kap në flagrancë.
Gjithashtu kujtojmë se një rast i ngjashëm është konstatuar vetëm pak ditë më parë në Korçë ku policia ka vënë në pranga një person dhe ka shpallur në kërkim një tjetër pasi janë kapur duke transportuar 44 emigrantë të paligjshëm, kundrejt fitimit.
Bëhet fjalë konkretisht për të arrestuarin me iniciale A. A., 37 vjeç, banues në Levan, Fier, i cili u kap në aksin rrugor Korçë-Pogradec, pranë fshatit Leshnicë, Pogradec, duke transportuar me mjetin tip furgon të markës “Fiat Ducato”, 32 emigrantë të paligjshëm, të cilëve kundrejt shpërblimit, iu kishte premtuar kalimin drejt vendeve të BE-së.
Ndërsa u shpall në kërkim O. D., 37 vjeç, banues në Elbasan, i cili pasi ka konstatuar se shërbimet e policisë, ishin në ndjekje të tij, ka braktisur mjetin tip “Volkswagen” në lagjen nr. 1, Pogradec, brenda të cilit u gjetën 12 emigrantë të paligjshëm, duke u larguar me shpejtësi.
