“Më mirë do bëhet”, reagimi i Damian Gjiknurit pas Asamblesë së PS

Damian Gjiknuri u mënjanua nga detyra e Sekretarit të Përgjithshëm të PS-së, ndërsa në vend të tij u emërua përkohësisht Blendi Klosi.

Duket se ky ka qenë vendimi surprizë i ndërmarrë nga Edi Rama, kryeministër dhe kryetar i PS-së, ndërsa nuk janë bërë publike arsyet sepse ndodhi ky zëvendësim i Gjiknurit.

Klosi do të qëndrojë në detyrën e Sekretarit të Përgjithshëm deri në shtator, kohë kur sërisht do të ketë një mbledhje tjetër të Asamblesë Kombëtare të PS-së.

Gjiknuri ka shmangur komentet për mediat lidhur me vendimin, por tha “kemi kohë për komente! Më mirë do bëhet!”.

Damian Gjiknuri, ish-ministër i Ekonomisë, përmendet në dosjen që SPAK depozitoi në Kuvend, kur kërkoi arrestimin e ish-zv.Kryeministrit Arben Ahmetaj. Drejtuesi i SPAK tha se hetimet për inceneratorët vijojnë, ndërsa konsideroi si sekret hetimor, përmendjen e emrave të personazheve që po hetoheshin. Nuk dihet nëse SPAK po heton Gjiknurin apo ky i fundit është në proces verifikimi, për rolin që ka pasur në atë që njihet si afera e inceneratorëve.