Makineria inteligjente për kapjen e shkeljeve rrugore është vendosur sot në punë, pas pothuajse dy javë nga inaugurimi i saj e dhjetëra aksidenteve të shënuara në vend gjatë kësaj periudhe. Vetëm 15 shoferë të pabindur kanë rënë në prangat e policisë rrugore për shkak të shkeljes së rregullave të qarkullimit.
Gjatë 72 orëve të fundit policia bën me dije se në kuadër të kontrolleve me radarë, makinën inteligjente, dronë, mjete të paloguara, kamera, aparate fotografike e alkooltestues, përveç arrestimeve janë hequr 75 leje drejtimi dhe janë ndëshkuar 2421 shoferë.
Gjithashtu, gjatë 3 ditëve të fundit, si rezultat i përdorimit të makinës inteligjente në akse rrugore me risk e në vende të cilësuara si njolla të zeza, janë vendosur 2134 masa administrative, për shpejtësi tej normave të lejuara, për mosvendosje të rripit të sigurimit dhe për përdorim të celularit gjatë drejtimit të automjetit.
