Kemi mbërritur në fazën më emocionuese të sezonit dhe fatet e një sezoni të tërë plot vështirësi vendosen pikërisht tani.
Gjatë gjithë sezonit, Kolela nuk ka hezituar aspak të aktivizojë lojtarë të rinj dhe t’u japë atyre mundësinë të fitojnë eksperiencë dhe të tregojnë sa vlejnë. Në listën e gjatë mund të përmendim djem si Buxhelaj, Hodo, Dragaj, Junuzi, Zekolli apo Zuna.
Por duket se tashmë kemi mbërritur në situatën ku lojtarët më me eksperiencë apo më ekspertë duhet të marrin përgjegjësitë, me të rinjtë, që duhet të hapin krahun. Dhe kështu ka ndodhur, pasi emra si Buxhelaj, Hodo apo Zekolli nuk po i shohim shumë në fushë. Arsyeja është e thjeshtë, luhet nën një presion të madh dhe çdo gabim rëndon, pasi nuk ka më hapësirë për korrigjime.
Xhovani Kolela është trajneri që ka bërë më së shumti ndryshime në formacion gjatë këtij sezoni, por një bosht lojtarësh kanë qenë të palëvizshëm.
Nëse i bëjmë një renditje futbollistëve më të aktivizuar te Partizani, Andi Hadroj është rekordmeni i këtij sezoni, teksa ai ndiqet nga Rexhepi. Më pas vjen Sota, si dhe treshja e mesfushës, që janë shtyllat e ekipit. Pjesa tjetër e ekipit ka pësuar vazhdimisht ndryshime.
Discussion about this post