Ish-ministri i Mbrojtjes, Fatmir Mediu, është shprehur se gjatë seancës së sotme në GJKKO, u vërtetua qartë se ai ka respektuar vetëm detyrën dhe ka zbatuar vetëm ligjin gjatë kohës që ka qenë ministër.
Komentet Mediu i bëri pas daljes nga ambientet e GJKKO-së, ku dëshmuan disa persona të thirrur nga SPAK, lidhur me çështjen e shpërthimit në fabrikën e demontimit në Gërdec.
Mediu tha gjithashtu se nga dëshmitë u vërtetua qartë ndarja e civilëve dhe ushtarakëve në atë proces dhe i bëri thirrje të gjithëve që kanë diçka për të dëshmuar, ta dëshmojnë, për të ndihmuar në zbardhjen e të vërtetës.
“Dëshmitarët kanë qenë në dy grupe. Kanë qenë dëshmitarë që kanë qenë pjesë e komisionit të çmimeve të municioneve dhe të kategorizimit të municioneve. Komisioni i çmimeve ka qenë me civilë dhe ushtarakë, ndërsa kategorizimi ka qenë tërësisht ushtarak, nivelet më të larta të njohjes së armatimit.
Doli e qartë se s’ka pasur asnjë indicie nga ministri i Mbrojtjes së kohës që të shtynte as VKM as urdhërat apo përmbajtjen e tyre apo të ndikonte në vendimmarrjen e këtyre njerëzve në dy komisioneve. Po ashtu doli e qartë ndarja e civilëve nga ushtarakët. Doli që demontimi nuk ishte përgjegjësi e ministrit.
Është një process që tregon se ministri vetëm ka zbatuar ligjin, detyrën dhe detyrimet ndërkombëtare. Janë dëshmitarët e prokurorisë dhe unë nuk e di kush do dëshmojë apo jo. Ka raste kur dëshmitarët përfitojnë nga heshtja. Por është mirë që gjithsecili të vijë edhe të mbajë një qëndrim për zbardhjen e të vërtetës”, tha Mediu.
Discussion about this post