Në intervistën e saj të parë, pas dy viteve larg mediave, bashkëshortja e Donald Trump, Melania, foli për Fox News me qëllim promovimin e librit të ri të saj.
“Ka ardhur koha që të tregoj historinë dhe të vërtetën time”, tha ajo, duke nisur me kujtimin e takimit të parë të pazakontë me bashkëshortin e saj aktual.
Sipas fjalëve të saj, në kohën kur u njohën, Trump tashmë njihej si një biznesmen i shquar amerikan, gjë që e bënte të vështirë për ta të shkonin në një restorant, kafe apo kinema. Në vend të kësaj, Trump e çoi në një vend të veçantë ku mund të kishin privatësi. Ata së bashku shkuan për të parë një pronë që Trump synonte të blinte, dhe Melania e përshkroi këtë takim të parë si një përvojë shumë të bukur.
“Pasi ishim vetëm në makinë për rreth një orë ose një orë e gjysmë. Nuk kishte zhurma të tjera, as njerëz të tjerë. Në atë kohë ai tashmë njihej si një person i famshëm, kështu që ishte shumë e këndshme të ishim vetëm ne të dy”, tha Melania, duke shtuar: “Më pëlqente vizioni që ai kishte. Dhe lidhja që kishim. Ishte diçka shumë e veçantë”.
“Ishte ditëlindja ime. Dhe ishte Met Gala. Të gjitha ndodhën në një natë. Ishim tashmë në shtëpi, të dy të veshur për mbrëmjen gala”, kujtoi Melania natën kur Trump i propozoi pas kthimit në shtëpinë e tyre të përbashkët. Ata u martuan në janar të vitit 2005.
Në prag të zgjedhjeve të reja presidenciale, ish-modelja foli për anën e Trump që e shohin vetëm ata më të afërtit. Ndërsa në fjalimet e tij ai duket shumë i ashpër, Melania theksoi arsyet përse është ende e dashuruar me të: “Humori i tij, personaliteti, mirësia. Ai është shumë i veçantë. Pozitiviteti i tij. Energjia e tij. Është e mahnitshme”.
Kujtojmë se këto janë kujtimet e para të saj. Zyra e Melanias i ka përshkruar ato si një histori të fuqishme dhe frymëzuese të një gruaje që ka ndërtuar rrugën e saj, ka kapërcyer të gjitha vështirësitë dhe ka “definuar përsosmërinë personale”.
Ish-zonja e parë “fton lexuesit në botën e saj, duke ofruar një portret intim të një gruaje që ka jetuar dhe vazhdon të jetojë një jetë të jashtëzakonshme”, thuhet në njoftimin e librit. Memoaret e Melanias përmbajnë histori personale dhe fotografi familjare që nuk janë ndarë më parë me publikun.
Discussion about this post