Trajneri i Vllaznisë Migen Memelli debutoi me fitore në kampionat në këtë aventurë me skuadrën shkodrane. “Blaugranat shqiptarë” mposhtën bindshëm me rezultatin 3-1, Kukësin në shtëpi. Në prononcimin pas ndeshjes tekniku, u shpreh i kënaqur për rezultatin, teksa evidentoi edhe disa probleme që duhen korrigjuar në javët në vazhdim:
“Duke qenë se është ndeshja e parë, ky trepikësh rrit moralin e skuadrës. Kampionati ka një melodi tjetër, ju e patë çfarë ndodhi në Rrogozhinë, ku pretendentët e Egnatias u mposhtën nga Skënderbeu. Të gjitha skuadrat dinë të luajnë futboll. Kukësi ishte i vendosur mirë në fushën e lojës. Sot kemi bërë vetëm detyrën. Nuk ka nevojë për eufori të madhe.
Jam i pakënaqur në 30 metrat e fundit, ku skuadra shpërdoroi shumë. Shpresoj që ndeshjet në vazhdim të jenë më të mira. Më mërziti dalja e Juriç dhe dëmtimi i Krymit para 3 ditësh. E dëgjova me kujdes Xhihanin kur tha Egnatia i ka të sigurt 4 fitore, gjithsesi në futboll nuk i dihet asnjëherë. Të gjithë kemi problemet tona në fillim të kampionatit.
Do të punojmë akoma dhe më tepër në fazën difensive. Kukësi në një rast që erdhi në portë na shënoi. Do të shtojmë manovrat, arti i të mbrojturit është një lexim loje te kundërshtarët. Tek ai rast ka pasur një moment delikat, dikush doli huq, topi ngeli në zonë. Për mua kanë rëndësi të dyja fazat. Ky kampionat do të shkojë deri në 100 minuta. Tranzicion është vrasës sot. Nga një standarte pro, kundërshtari na erdhi dhe na shënoi. Do të shtojmë volumin e punës në fazën mbrojtëse. Sot duke ditur që Kukësi është më e dobët se ne realisht, u përpoqëm të shtonim manovrën sulmuese.
Larmia që kishit lojtarët në lojë, ishte e kënaqshme, krijuam shumë me Grudën, Çobën, Balajn. Do të preferoja që lojtarët të shënonin më tepër dhe shtrirja e golave të shpërndahej. Do të preferoja më shumë që lojtarët e krahëve të bënin më mirë dhe të ishin më altruist. Në ditët në vazhdim do të shtrihemi në lojë.
Ne kishim përgatitur një strukturë tjetër loje. E prisnim me 4-2-3-1 Kukësin. Patëm pak vështirësi. Kam kërkuar që në fillim që lojtarët në presingun ultraofensiv të ishin në kohë. Në disa raste nuk më pëlqeu kjo gjë. Ka gjëra për t’u përmirësuar gjatë kampionatit. Do të shikojmë çfarë kemi bërë mirë dhe ku kemi gabuar.
Të gjithë lojtarët janë në planet e Vllaznisë, ashtu sikurse dhe Alivodës. Për sa kohë është lojtar i Vllaznisë do të jetë në planet e mija. Kampionati është shumë i gjatë do të ketë minuta për të gjithë. Kur të shkojmë në “Final 4” do ta jap dhe konstatimin tim kush e fiton kampionatin”, u shpreh Memelli në intervistën pas ndeshjes./PanoramaSport
Discussion about this post