Ftohja e raporteve mes presidentit të Partizanit, Gaz Demi, dhe Kryetarit të Grupit Parlamentar të PS-së, Taulant Balla, duket se ka prodhuar efektet e para edhe në futboll. Në këtë klimë tensioni, ai që ka lëvizur më shpejt duket të jetë Agim Demrozi, presidenti i Egnatias.
Burime pranë klubit flasin për një lëvizje që vështirë të shihet thjesht si transferim sportiv. Djali i deputetit socialist, Robin Balla, pas përplasjes verbale të babait të tij me drejtuesit e Partizanit, ka gjetur menjëherë derën e hapur te Egnatia, ku ka firmosur për ekipin U19.
Lëvizja ngre pikëpyetje jo të vogla, sidomos duke pasur parasysh peshën politike të Taulant Ballës në qarkun ku Egnatia ushtron influencën e saj sportive. Si drejtues politik i PS-së në zonë, Balla mbetet një figurë kyçe për mazhorancën lokale, çka i jep transferimit një lexim që shkon përtej fushës së blertë.
Për shumëkënd, pranimi i menjëhershëm i Robin Ballës nga Egnatia shihet si një “qokë” e pastër e Agim Demrozit për Taulant Ballën — një sinjal afrimi politik në një moment kur marrëdhëniet me Gaz Demin janë krisur dukshëm.
gijotina.com/
Discussion about this post