Kancelarja gjermane, Angela Merkel, ka zgjedhur që të vizitojë Beogradin dhe Tiranën në atë që po quhet si udhëtimi lamtumirës i saj për Ballkanin Perëndimor. Gjatë qëndrimit në Serbi, Merkel ka takuar kreun e shtetit serb, Aleksander Vuciq, me të cilin kanë biseduar për tema që preokupojnë Ballkanin Perëndimor, specifikisht edhe për punën e dialogut dhe marrëveshjes me Republikën e Kosovës.
Pas një dite qëndrim në Beograd, Merkel ka mbërritur sot në Tiranë, ku është pritur me ceremoni të lartë shtetërore nga kryeministri Edi Rama. Por pse Merkel nuk zgjodhi që të vizitojë edhe Prishtinën gjatë këtij qëndrimi në Ballkanin Perëndimor.
Lidhur me këtë për “Gazetën Express” kanë folur nga zyra për median e Qeverisë gjermane. Christian Lichtwardt, zyrtar i qeverisë ka thënë se do të ishte shumë e vështirë që të vizitoheshin të gjashtë kryeqytetet për shkak të aspektit logjistik dhe për shkak të kohës.
Megjithatë shtoi se janë të lumtur që të gjithë janë pajtuar për të shkuar drejt Tiranës.
“Logjistikisht dhe në aspektin kohor, do të kishte qenë e vështirë të udhëtosh në të gjashtë kryeqytetet. Prandaj, ne jemi të kënaqur që të gjithë ranë dakord të vinin në Tiranë”, ka thënë Lichtwardt.
