Në mbledhjen e sotme të Konferencës së Kryetarëve, është miratuar propozimi i kreut të Grupit Parlamentar të Partisë Socialiste, Taulant Balla, për zhvillimin e mbledhjeve të Komisioneve Parlamentare fizikisht, dhe jo online.
Në projekt- vendimin e miratuar nënvizohet gjithashtu se për të marrë pjesë në mbledhjet e Komisioneve, deputeti duhet të dorëzojë pranë sekretarisë së komisionit certifikatën e vaksinimit ose testin PCR negativ të kryer jo më vonë se 48 orë përpara fillimit të mbledhjes.
Gjithashtu, mbledhjet mund të zhvillohen dhe online në disa raste specifike, deri në përfundimin e pandemisë së Covid.
Përcaktimi i mënyrës së organizmit të Komisioneve Parlamentare ka shkaktuar debate të shumta mes mazhorancës dhe opozitës, pasi qeveria u shpreh më herët se komisionet do mbahen online, ndërsa opozita e ka kundërshtuar këtë vendim.
Socialistët kërkuan që mbledhjet të zhvillohen online si vitin e kaluar si masë kufizuese për ndalimin e përhapjes së pandemisë, ndërsa deputetët demokratë kanë bërë të qartë se do të paraqiten fizikisht sepse nëse mbledhjet zhvillohen online, asgjë nuk do ishte e qartë për qytetarët.
Javës që shkoi, opozita u paraqit fizikisht në sallë për mbledhjet e Komisioneve, këmbëngulja e të cilëve bëri që PS të tërhiqet nga vendimi.
