Mes emrave të përzgjedhur në Këshillin Kombëtar të PD, ishte edhe ai i ish-deputetit Myslim Murrizi.
Ai ka reaguar përmes një postimi në rrjete sociale duke ironizuar se tani është në listën “anti-Amerikane”.
Murrizi shkruan se nuk është pjesë e PD nga ish sigurimi e as nga emigrimi, as nga njohja me familjarët e Kryetarit të PD, por nga bindjet e tija dhe shpirti rebel prej dhjetorit 1990.
“Një falenderim për të gjithë delegatet DEMOKRAT të Kuvendit të datës 30 prill 2022 që me votën e Tyre më besuan të jem anëtar i Këshillit Kombëtar të PD dhe me futën në listën e “ anti” Amerikanëve të alibash-bardhtabak-gjekpompurëve. Një falënderim të veçantë për të gjithë delegatët që miratuan rezolutën ku dënohej djegia e mandateve dhe falja e 60 bashkive si një gabim fatal dhe vrastare për DEMOKRATËT e për PD. Kjo ishte më shumë se ndjesë publike, për gjithçka që kane thënë e akuzuar prej 19 shkurtit 2019 në adresën time për mos djegien e mandatit. Në PD jam nga bindjet e mia dhe shpirti rebel prej dhjetorit 1990 dhe deputet i saj kam qenë dy herë kur PD ka qenë në opozitë( 1997-2001 dhe 2017-2021) e nuk kam qenë pjesë e pushtetit të PD në vitet 2005-2013”, shkruan Murrizi.
Mes të tjerash Murrizi shpreh vlerësim për të gjithë demokratët që janë pjesë e grupit të Rithemelimit.
“Në çdo vendim e qëndrim timin politik, prej 32 vitesh, mes zemrës dhe mendjes, kam bërë atë që më ka thënë zemra, sepse mendja është pak hileqare. Ndoshta ky ka qenë një “ defekt” jo i vogël për mua, por unë jam ndjerë dhe ndjehem shumë shumë rehat me veten, me miqtë dhe kam patur e kam kurajën të shoh ne sy e t’i qëndroj përballë gjithkujt E me ndihmën e të Madhit ZOT, kështu do jem derisa të kem frymë e të jem gjallë, edhe pse e di shumë mirë që nuk iu pëlqej hipokritëve, lëpirësve, servilëve dhe çdo kategorie të pështirë të shoqërisë ku jetojmë. Edhe njëherë respekte e vlerësim për të gjithë DEMOKRATËT”, shkruan Murrizi.
Discussion about this post