Legjenda e futbollit, Ronaldinho ka folur së fundi për treshen shumë të diskutuar të skuadrës së Paris Saint-Germain, Messin, Neymar dhe Mbappen.
Në një intervistë të dhënë për ‘Le Parisien’ braziliani ka folur me superlativa për treshen MMN. Braziliani ka theksuar se është habitur kur Messi kaloi te PSG-ja, por në të njëjtën kohë ndjehet i lumtur për këtë vendim të mikut të tij të vjetër.
“Jam i lumtur që e shikoj në një klub ku unë kam nisur aventurën time në Europë. Nuk mendoja se mund të ndodhte! Isha i sigurt se do ta mbyllte karrierën te Barcelona, për mua ka qenë një surprizë.”-tha ai.
Ndërsa për Neymar u shpreh se është më i miri në Brazil dhe ndaj sipas tij kritikohet vazhdimisht.
“I kritikuar në Brazil? Të gjithë ne kalojmë momente të vështira. Por mendoj se të gjithë në Brazil e dinë se është lojtari më i madh në qarkullim. Kur gjërat nuk shkojnë mirë, bëhet gjithçka shumë e vështirë për të sepse është më i madhi, ka presion mbi të.”-deklaroi Ronaldinho.
Ish-futbollisti nuk harroi të ‘ngrinte në qiell’ edhe Mbappen, për të cilin theksoi se një ditë do jetë i paarritshëm.
“I përket një brezi tjetër, por ke dëshirë ta shikosh të luajë. Është një djalë i mbarë, stili i tij i lojës që e dua, e duan të gjithë. Më pëlqen ta shikojë të luajë. Mbappe do të jetë ‘Topi i Artë’ një ditë, është shumë i ri, por ka bërë shumë që tani.”-tha ndër të tjera legjenda./K.T/Gijotina.com
