Sot u shënua një shekull që nga lufta heroike e Dibrës dhe betejës së lavidshme të Lanë-Lurës, për mbrojtjen e trojeve shqiptare nga pushtuesit mizorë serbë.Në nder të kësaj dite u mbajt dhe një aktivitet nga dibranët në Pallatin e Kulturës në Kamëz.
I pranishëm në këtë ceremoni ishte dhe presidenti Ilir Meta, i cili u prit nga kryebashkiaku i Partisë Socialiste në Kamëz, Rakip Suli.
Në një postim në facebook, Meta ka vlerësuar rolin e të gjithë patriotëve të Lurës dhe Dibrës që shpëtuan kufijtë e Shqipërisë nga pushtuesit, teksa e ka cilësuar aktivitetin si burim frymëzimi dhe për brezin e ri, që mban gjallë traditat e të parëve.
“Nder dhe kënaqësi e veçantë të merrja pjesë sot në takimin festiv të organizuar në Pallatin e Kulturës në Kamëz, me rastin e 100-vjetorit të Luftës heroike të Dibrës dhe betejës së lavidshme të Lanë-Lurës, për mbrojtjen e trojeve shqiptare nga pushtuesit mizorë serbë.Sot kjo ngjarje është një burim frymëzimi për të gjithë ne dhe veçanërisht për brezin e ri, që i mban gjallë traditat e të parëve dhe kujtimin e tyre të paharruar.
Një shekull më pas, burrëria, trimëria dhe heroizmi i patriotëve të Lurës dhe të Qarkut të Dibrës, na dëshmon se nuk ka gjë më të shenjtë dhe më të shtrenjtë se Sovraniteti, Integriteti dhe Pavarësia e Shqipërisë, për të cilën është derdhur aq shumë gjak dhe janë kryer aq shumë sakrifica sublime dhe të panumërta.I përjetshëm kujtimi i të gjithë patriotëve të Lurës dhe të Dibrës, të cilët me në krye Elez Isufin shpëtuan kufijtë e Shqipërisë!”, shkruan Meta.
Discussion about this post