Meta: Në mandatin e parë do të dyfishojmë pensionet

Kryetari i Partisë së Lirisë, Ilir Meta, është shprehur se qeveria shqiptare është e pandjeshme ndaj pensionistëve.

Gjatë një takimi që zhvilloi me pensionistët në Tiranë, ai tha se shumica e qytetarëve shqiptarë sa vjen e varfërohen gjithnjë e më shumë.

Meta premtoi se do të bëjmë gjithçka që në mandatin e parë të dyfishohen pensionet

“Jeni gjeneratë e pashpërblyer por kjo edhe na motivon shumë për të rritur bashkëpunimin me ju për të bërë më të mire. Në vitet e fundit çmimet janë rritur ndërkohë që pensionet kanë ngelur në vend. Do të mjaftonte një krahasim i thjeshtë për të parë një shpërfillje nga qeveria ndaj kësaj kategorie.

Rama gjithmonë pensionistët i ka parë si njerëz që thjesht në mënyrë të verbër mund të votojnë për partinë e tij. Lëshoi gati zero përkujdesje për pensionistët ama zemërgjerësi pafund për oligarkët.

Ndaj, dua të shpreh edhe njëherë tjetër solidaritetin më të madh të Partisë së Lirisë me të gjithë ju dhe të siguroj se mbështetja për ju do të jetë prioritet i jashtëzakonshëm nga ne. Do të luftojmë qindra milionë euro të Bashkisë së Tiranës të shkojnë në mbështetje tuaj dhe jo për inceneratorët.

Do bëjmë gjithçka që në mandatin e parë të 2-fishohen pensionet. Do bëjmë gjithçka për të ndalur largimin e të rinjve dhe të rejave nga vendi ynë. Kjo është një dramë kombëtare por edhe një dramë shoqërore. Kjo bëhet duke i krijuar mundësi të rinjve që të punësohen këtu me vende pune dhe paga dinjitoze. Nuk ka më shumë mundësi financiare Kosova në krahasim me ne. Ne i kemi mundësitë shumë herë më të mëdha por këtu nuk janë prioritet të rinjtë dhe pensionistët”, deklaroi ai.