Meta Inc, e njohur më parë si Facebook tha të hënën se ka ngritur një padi federale në gjykatën e Kalifornisë kundër kriminelëve kibernetikë që mashtrojnë njerëzit, në mënyrë që të vjedhin të dhënat e tyre personale përmes hyrjes në faqet e rreme të hyrjes për Facebook, Messenger, Instagram dhe ËhatsApp. Sulmet e ‘phishing’ i joshin viktimat drejt një lidhjeje që duket se operohet nga një ent i besuar, megjithatë, faqja e internetit është me qëllim të keq dhe përmbajtja e rreme e sajtit është krijuar për të bindur një viktimë të fusë informacione të ndjeshme, si një fjalëkalim ose adresë emaili.
Sipas Metës, skema e ‘phishing’ përfshinte krijimin e më shumë se 39,000 faqeve të internetit që imitonin faqet e hyrjes në Facebook, Messenger, Instagram dhe WhatsApp. Në këto faqe interneti, njerëzve u kërkohej të vendosnin emrat e përdoruesve dhe fjalëkalimet e tyre, të cilat hakerët i mblodhën. Gjigandi i teknologjisë sociale në një postim në blog vëren se kriminelët kibernetikë përdorën një shërbim transmetues për të ridrejtuar trafikun e internetit në faqet e internetit të phishing në një mënyrë që errësonte infrastrukturën e tyre të sulmit. Kjo u mundësoi atyre të fshehin vendndodhjen e tyre të vërtetë, identitetet dhe madje edhe emrin e ofruesve të tyre të mbajtjes në internet.
Duke filluar nga marsi 2021, kur vëllimi i këtyre sulmeve u rrit, Meta tha se pezulloi mijëra URL në faqet e internetit të phishing. “Kjo padi është një hap më shumë në përpjekjet tona të vazhdueshme për të mbrojtur sigurinë dhe privatësinë e njerëzve, për të dërguar një mesazh të qartë për ata që përpiqen të abuzojnë me platformën tonë dhe për të rritur përgjegjësinë e atyre që abuzojnë me teknologjinë,” Jessica Romero, drejtoreshë e zbatimit të platformës dhe proceseve gjyqësore të Meta , thuhet në një deklaratë.
Ndërkohë, padia vjen disa ditë pasi kompania e teknologjisë sociale njoftoi se platformat e saj ishin përdorur nga shtatë kompani mbikëqyrëse me qira me bazë nga Kina, Izraeli, India dhe Maqedonia e Veriut për të spiunuar ose gjurmuar deri në 50,000 njerëz në 100 vende. Muajin e kaluar, Meta tha se kishte ndaluar katër grupe kibernetike keqdashëse për të shënjestruar gazetarët, organizatat humanitare dhe forcat ushtarake kundër regjimit në Afganistan dhe Siri.
Discussion about this post