Presidenti Ilir Meta ka shpërndarë mesazhin për paqe të Papa Françeskut nisur nga lufta e përgjakshme në Ukrainë, ku prej shtatë ditësh rusët po bombardojnë qytetet kryesore.
Në një mesazh në Facebook, kreu i shtetit kërkon nga qytetarët shqiptarë që të luten dhe të angazhohen për të forcuar demokracinë dhe respektimin e të drejtave të njeriut.
“Sot më 2 mars, ju ftoj t’i bashkohemi thirrjes së Papë Franceskut për t’u lutur për paqe në Ukrainë dhe për popullin heroik të Ukrainës që më shumë se kurrë, përmes sakrificave të jashtëzakonshme në mbrojtje të lirisë, sovranitetit, dinjitetit kombëtar dhe vlerave europiane ka nevojë për mbështetje dhe solidaritet mbarëbotëror. Le të lutemi për paqe por të angazhuar fuqimisht për të forcuar demokracinë, respektimin e të drejtave të njeriut, në mbrojtje të sovranitetit, të përkushtuar në zhvillimin e vendit, e duke shërbyer si promotorë të harmonisë dhe paqes kombëtare, rajonale e më gjerë, të palëkundur në krah të NATO-s dhe të vendosur në rrugën e integrimit europian”, shkruan Meta.
Para dy vjetësh, Meta thirri më 2 mars të gjithë qytetarët për një protestë paqësore, që sipas tij ka qenë “manifestimi më i mrekullueshëm për liri dhe demokraci”, ndërsa ka premtuar se pas mandatit të presidentit do të rikthehet fuqishëm në skenën politike në vend.
Discussion about this post