Ilir Meta, kryetar i Partisë së Lirisë, përmes një postimi në rrjetet sociale, shprehet se SPAK nuk prek me dorë dosjet që ka denoncuar opozita, edhe pse ato faktojnë korrupsionin e Qeverisë.
Por sipas tij, prioritet në punën e SPAK, kanë denoncimet e kallëzuesve të rremë, njerëzve me probleme e të dënuar.
“Shumë çështje që deputetë, funksionarë, drejtues të Partisë së Lirisë apo të opozitës i kanë depozituar në SPAK, të cilat cënojnë në mënyrë të drejtpërdrejtë interesin publik, të cilat dëshmojnë korrupsion të faktuar nuk preken, pavarësisht se për to kanë firmosur deputetë, kanë firmosur emra të njohur publikë.
Ndërkohë, ju e keni parë që një nga bizneset më të mëdha të kësaj qeverie është ai i sponsorizimit të kallëzuesve të rremë, njerëz me probleme, njerëz të dënuar nga gjykata, njerëz të dënuar edhe jashtë vendit jo vetëm këtu, të cilat ndiqen me prioritet dhe është e drejta e tyre t’i ndjekin”, shkruan Meta.
Në vijim ai shprehet se beteja e opozitës është kundër kapjes së shtetit, kundër korrupsionit dhe gjithashtu kjo është një përpjekje që ne bëjmë që edhe Drejtësia të çlirohet sa më parë nga ky presion kaq i madh intimidues.
Discussion about this post