Kreu i Partisë së Lirisë, Ilir Meta, në një takim me strukturat e Partisë së Lirisë në Vaun e Dejës, iu bëri thirrje mbështetësve që tij që ta kthejnë 14 majin, ditën e zgjedhjeve, në referendum.
Ai tha se Rama duhet t’i shuajë shpresat nëse mendon se opozita s’do të marrë pjesë në zgjedhje.
“Por përmes këtij akti kaq brutal që ka shokuar çdo njeri që ka njohuritë më minimale ne jurisprudencë, Rama tregoi panikun e thellë në të cilin është nga zgjedhjet që po vijnë, nga opozita e vërtetë, deligjitimoi tërësisht qeverisjen e vet. Çdo shpresë e tij se opozita do mungojë në 14 maj të jetë qartësisht e shuar për cilindo, opozita do jetë më 14 maj te qendrat e votimit, do i kthejë zgjedhjet e 14 majit në një referendum për pluralizmin në Shqipëri. Kemi një pushtet vendor monist, një pushtet vendor diskriminues e jo transparent.
T’i japim fund këtij modeli arrogant të qeverisjes së Rinlindjes. Të ndërtojmë ura komunikimi me të gjithë ata që kërkojnë qeverisje të ndershme, dhe jo me ata që e kanë mendjen të bëjnë tendera. Jam besimplotë se qarku i Shkodrës do shkëlqej më 14 maj, jam i sigurt se ashtu sikurse Shkodra më 6 mars, tregoi qartë orientimin e saj drejt lirisë, drejt demokracisë, dinjitetit dhe nuk u përkul në një moment të paqartë për qytetarët.
E gjithë Shqipëria do jetë si Shkodra më 6 mars, duke ndëshkuar Rilindjen, Ramën një frikacak që ka tmerr nga vota e lirë, Ramën, korruptuesin më të madh të Parlamentit, që korruptoi edhe drejtorin e kundërzbulimit të FBI-së”, tha ndër të tjera Meta.
Discussion about this post