Komiteti Shqiptar i Helsinkit i ka kërkuar sqarime drejtorisë së burgut “Jordan Misja” lidhur me pretendimet se kreut të Partisë së Lirisë, Ilir Meta, po i kufizohen takimet me deputetë të Kuvendit të Shqipërisë dhe eurodeputetë. Në një letër drejtuar drejtorit të burgut, Arjan Bozhaj, Komiteti thotë se është vënë në dijeni të ankesave të Ilir Metës dhe deputetit të Partisë së Lirisë, Tedi Blushi.
Sipas Komitetit, disa prej takimeve të kërkuara nga Meta nuk janë lejuar, ndërsa atij nuk i është bërë e ditur një vendim i arsyetuar apo baza ligjore mbi të cilën është vendosur kufizimi. Helsinki thekson se një problematikë e ngjashme është konstatuar edhe më herët gjatë monitorimit në burgun “Jordan Misja”.
“Ngrihen shqetësime lidhur me moslejimin e zhvillimit të takimeve të këtij të fundit me deputetë të Kuvendit të Shqipërisë dhe deputetë të Parlamentit Evropian, pa u bërë me dije një vendim i arsyetuar apo baza ligjore mbi të cilën është mbështetur ky kufizim”, thuhet në letër.
Për këtë arsye, organizata kërkon të mësojë nëse kanë ndryshuar rrethanat që mund të justifikojnë kufizimet e pretenduara dhe cilët janë personat përgjegjës për këtë vendimmarrje. Komiteti i ka kërkuar drejtorisë së burgut informacion të plotë mbi rastin dhe mënyrën se si janë trajtuar kërkesat për takime.
“Rikthimi i pretenduar i së njëjtës praktikë ngre shqetësim dhe kërkon sqarim për personat e përfshirë, veçanërisht nëse kanë ndryshuar rrethanat faktike që do të justifikonin një qasje të ndryshm”, thuhet në letër.
Në një raport të publikuar në prill, Komiteti Shqiptar i Helsinkit kishte ngritur më herët shqetësime edhe për kushtet e paraburgimit të Ilir Metës, duke evidentuar problematika lidhur me ajrimin, takimet me familjarët dhe kushtet në qeli.
Letra
Discussion about this post