Presidenti i Shqipërisë, Ilir Meta, me anë të një postimi në rrjetet e tij sociale, ka bërë të ditur takimin që ka pasur me drejtuesen e Fondacionit “Robert Bosch”, znj.Sandra Breka dhe delegacionin, që e shoqëronte.
Ai ka përgëzuar kontributin e tyre për promovimin e paqes, stabilitetit dhe shtetit të së drejtës në vendet e Ballkanit Perëndimor.
Gjithashtu ai u shpreh se i kishte garantuar atyre se do të bënte gjithçka për promovimin dhe konsolidimin e bashkëpunimit rajonal në interes të paqes në Shqipëri, duke e konsideruar këtë gjë si e vetmja rrugë për integrimin e plotë në Bashkimin Europian.
“Përgëzova kontributin e tyre për promovimin e paqes, stabilitetit dhe shtetit të së drejtës në vendet e Ballkanit Perëndimor, si dhe theksova nevojën për forcimin e bashkëpunimit rajonal, në interes të së ardhmes europiane të popujve dhe qytetarëve tanë.
I garantova se do të bëj gjithçka për promovimin dhe konsolidimin e bashkëpunimit rajonal në interes të paqes, sigurisë dhe begatisë të vendeve tona, si dhe fuqizimin e demokracisë në Shqipëri, si e vetmja rrugë që do të garantojë integrimin e plotë në Bashkimin Europian.”- tha Ilir Meta.
Në fund, Meta kishte theksuar se është e rëndësishme përqendrimi në nismat rajonale gjithëpërfshirëse, që nuk ngushtojnë hapësirat e bashkëpunimit dhe as rivalizojnë proceset integruese.
